الإعلامية رضوى الشربيني تعلن مواصفات زوجها: “الجمهور فاكرني المرأة الحديدية”

المرفأ…قالت الإعلامية رضوى الشربيني خلال استضافتها في برنامج “أنا والقناع” من تقديم منى عبد الوهاب بأنها ليست عدوة الرجال، ولكنها عدوة أشباه الرجال المنتشرين في المجتمع موضحة: “أنا جيت في الدنيا بسبب راجل وهو أبويا وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل، اللى بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل”.

رضوى الشربيني: قابلت الحب الحقيقي بعد إنفصالي
كما أكدت رضوى الشربيني بإنها صادفت الحب الحقيقي بعد انفصالها، وأشارت إلي إنها قصة وانتهت: “قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها انتهت وانا مبحبش اتكلم عن القصص اللي انتهت بسبب اننا اتفقنا اننا لا نتفق”.

رضوى الشربيني: أحب أن يكون حنيّن وطيب ودمه خفيف

وعّن مواصفات الزوج الذي تتمناه رضوى الشربيني قالت: “لازم يكون راجل قادر والقدرة هنا بمعنى انه يكون قادر على العفو عند المقدرة عشان مبيصش على أخطائي ولا صغائر الأمور اللي أنا بعملها وهيكبر دماغه ومش هيبص على عيوبي، ولازم يكون قوي ويشاركني كل أموري ويكون سند وقوته دي تكون معايا مش عليا ولما يقرر انه مش عاوز رضوى الشربيني مبعملش اي حاجة غير انه هيجبني ويقولي في وشي انا أسف مش قادر أكمل”.وأكلمت الإعلامية رضوى الشربيني مواصفات شريك حياتها قائلة: “لازم يكون ناجح مقدرش أتجوز راجل مش ناجح ولا أنا اكون أنجح منه، ويكون عنده طموح ويتقي ربنا في البني أدمين ومكونش أنا اولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأن أنا صعبة، ويكون حنيّن وطيب ودمه خفيف عشان مقدرش اتجوز راجل دمه تقيل ابداً، ويكون شيك وخفيف في نفسه”.

الحياة بعد وفاة امي اختلفت كثيراً

وأضافت رضوى الشربيني: “الحياة بعد وفاة امي اختلفت كثيراً وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي”.
كما أوضحت بإنها لم تشعر بالوجع حينما أمسكت ورقة طلاقها بيدها مؤكده أن رصيدها في بنوك الوجع أكثر بكثير من قسيمة الطلاق حيث قالت عن تلك التجربة: “اكتشفت نفسي ولقيت اني انسان مش قابل يعيش العيشة دي، ورصيدي في بنوك الوجع اكثر بكثير من قسيمة طلاق، ومقدرش أعد الاوجاع دي، قسيمة الطلاق مش وجع انما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الاوقات كلمة انتي طالق بتوجع”.