كيف تصبح فيسيوكي شهير؟ كتب: عبدالهادي الشناق

كيف تصبح فيسيوكي شهير؟

كتب: عبدالهادي الشناق

المرفأ..الفسابكة طبقات، طبقة غنية بالإعجابات (هظول قصتهم قصة بنسولف بيها بعدين)، وطبقة متوسطة مستروة الإعجابات(اللايكات)، وطبقة فقيرة أو عاملة ويا دوب تحصل كم إعجاب (هظول مثلنا عالمهم الافتراضي مثل الواقعي).

خلونا نتسولف شوي عن الطبقة الفيسبوكية الغنية، وهي نوعين (نوع مشهور من دار أبوه، ونوع إشتهر فجأة وصار مشهور وما حد عارف كيف)، وإذا بدك تصير من النوع الأول بدك تشتغل على حالك بالواقع وتصبح مشهور وبس تفوت العالم الفيسبوكي بتنهال عليك الإعجابات هيل.

أما إذا بدك تصير من النوع الثاني فموضوعك سهل جداً، بس بدة فزعت اصحابك وعيلتك أو فزعة جيبتك (قروشك)، والقصة وما فيها إنه بتلم العيلة والأصحاب أو الجماعة وبتخلي كل واحد يعمله 10 حسابات وهمية (مثل: فلان العلاني من قرية س)، ولما يكون عندك 20 أو 30 شخص بتمون عليهم، ففعلياً صار عندك 200 أو 300 واحد متفاعل معك.

وهون ببل مشوارك نحو النجومية، ولازم تكتب منشورك بحضورهم عشان تبدأ التعليقات بشكل سريع، وخلال أقل من ساعة بكون عندك 300 تعليق واذا ربعهم كرر وانت رديت بجوز يصلو 700 أو 800، طبعاً وما ننسى في 300 إعادة نشر (شير)، وكل واحد على صفحاتهم رح يشوف كم إعادة النشر وكم التعليقات رح يصير يتابعك فضولاً قبل الإعجاب بما تقدمه من محتوى.

ويا أبوالحباب نقشت معك، وصار إلك اسم في عالم الفيسبوكيين، وصرت تحكي باسم مئات الألوف من العالم الإفتراضي إلي 80 ‎%‎ منهم احتمال يكونوا من الواق واق أو أبصر من وين، بس المهم إنه لصير يندفعلك عشان تروج لأي شغلة، وإنت بتصير تعرط “أنا ما أجيتكم ببرشوت أنا إنتم وإنتم أنا لأنكم إنتم إلي إكتشف شو عندي وأنا همي همكم”، وأعطيها من هذا الحكي عشان الناس بتحبه وخصوصاً إصحابك أو جماعتك.

هاظ عالمنا الإفتراضي، فإسرح وامرح على كيفك، تراها طعة وقايمة، إلا كما قلنا بالبداية، فهناك مشهورين كابر عن كابر بحكم مهنهم ومناصبهم، وهم يعيشون واقع افتراضي يعكس واقعهم الحقيقي، فالناس تتابعهم عبر المنصات الافتراضية وعبر شاشات التلفاز والراديو والصحف والمواقع الإخبارية وعبر اللقاءات الجماهيرية، وأينما وجدوا لهم تأثيرهم.