الزوج المهمل بقلم :هبه دسوقي معالج نفسي شعوري
المرفأ الاخبارية
الزوج المهمل المستبد مش لازم يمد إيده…
أحيانًا يكفي لسانه ، تجاهله ، تحكمه ، وبروده… عشان يحوّل البيت من مكان أمان لساحة استنزاف
الراجل اللي:
شايف إن وجوده في البيت كفاية… وكأن حضوره الجسدي حب
يخليكِ تشحتي كلمة حلوة، نظرة تقدير، حضن، سؤال بسيط حتي عاملة إيه؟
تطلبي اهتمام… فيقولك دلع فارغ
تعبّري عن احتياجك… فيتهمك إنك نكديه أو درامية
يوزع أوامره بسهولة… لكن يبخل بمشاعره كأنها دهب
يشوف دموعك عادية… ومش بعيد يعتبرها افورة
شايف نفسه دايمًا صح… وأي اعتراض منك قلة احترام
طلباته أوامر… واحتياجاتك رفاهية
عايزك متاحة طول الوقت… لكن هو مش متاح أبدًا
يجرحك، ثم يتهمك إنك حساسة
يهملك عاطفيًا… ثم يلومك إنك كتيره الشكوي
يضغطك نفسيًا… ثم يستغرب ليه بقيتي عصبية وتعبانة
ومع الوقت … الست مبتبقاش “ضعيفة” بس.. الست بتُنهك
جسمها يبدأ يتكلم لما هي تسكت:
صداع مزمن
وجع متنقل في الجسم
قولون، أرق، خنقة، نسيان
فقدان شغف، برود، رغبة في العزلة
وإحساس دائم إنها تقيلة ومكسورة من جوا
أخطر نوع أذى… هو الأذى اللي ملوش كدمات واضحة
اللي يخلي الناس تقول: “ماهو كويس وبيصرف”
وهي كل يوم بتدفع من أعصابها، صحتها، وروحها
الزوجة مش محتاجة قصر…
محتاجة راجل ميستهلكهاش وهو فاكر نفسه بيقود بيت
في ستات مش محتاجة دكتور… محتاجة تبعد عن سبب المرض